არ ვიცი, რა მჭირს ვერ გამიგია,
რატომ გაივსო ნაღველით გული?..
თითქოს დავმძიმდი მეტი დარდისგან,
რაღაცამ თითქოს დაბორკა სული...
საქმე ათასი, ფიქრი ულევი,
განსჯა, ჭოჭმანი და სინანული...
უაზრო ყოფა, უმიზნო ლტოლვა,
არც სიყვარული, არც სიხარული...
კეთება იმის, რაც არ გიზიდავს,
რაც არ ჭირდება არავის, მაგრამ
სხვა გზა არ არის, ამ გზით დაღლილი
ძვირფას დროს ასე უბრალოდ ვკარგავ...
თავს ძალას ვატან და არ ვჩერდები,
მივაპობ მღვრიე ცხოვრების ტალღებს,
არა, ადვილად ბედს არ ვნებდები,
თუმც განსაცდელი სულ კუდში დამდევს...
არა, დინებას მე არ გავყვები,
მაინც გავიტან ცხოვრების ლელოს...
გავალ გაღმა და ბაგირს გავიტან,
რომ ამ ბაგირმა სხვასაც უშველოს.
--------------------------
ქემო ქავთარი
No comments:
Post a Comment